السلام عليكم واهلا بيكم في فيديو
في مدينة برج العرب بالاسكندريه في مصر ام الدنيا وعلى حدود الساعه 10 الصبح يوم 15نوفمبر سنة 2020 يدخل راجل كبير قسم شرطة المدينه وملامح الخوف والرعب ماليه صوته وهوا بيقول الحقو تقريبا كده في هيكل عظمي فوق السطح عندي عشان تبدأ رحلة حل لغز اختفاء دام 4سنوات .لغز محير والصدمة ان تم حلها عن طريق الصدفة اي الي حصل ده الي حنعرفه في قضية النهارده فخليكم معايا... فاصل في الحقيقه انا مش بعمل قصص عربيه كتير لكن القصة دي بالذات شدتني جدا فقولت اعملكم فيديو عنها(هنا ممكن تعلني ان الفتره الجايه حيكون في قضايا عربي )...المقدمة القصة بدأت في يوم 15 نوفمبرسنه 2020 في مدينه اسمها برج العرب الجديده في محافظه الاسكندريه المدينه معروفه بهدوئها وجمالها وناسها الطيببين اغلب سكانها ناس مغتربين من محافظات تانيه بيجرو على لقمة عيشهم لانها تعتبر مدينه صناعيه اما سكانها الاصليين الي هما العرب فهما عايشين في مناطق اسمها النجوع اراضي صحراويه على اطراف المدينه عباره عن بيوت بدائية جدا يعني مش عماير ولا فلل وفي واحد من النجوع دي واسمه نجع الشواعر في منطقه سكنيه بتتسكن وتتأجر لناس مش عرب يعني من المغتربين المهم مش حطول عليكم الجو كان شتا ومطر ورعد وبرق طول الليل كعادت اسكندريه في الشتا فالبيوت غرقت ميه والشوارع ....كل واحد قافل عليه بابه لانه لو خرج حيتبهدل في الطين لحد تاني يوم الصبح لما الشمس بدأت تطلع..... ففي بيت من البيوت في منطقه الساكن لاحظ ان الميه بتاعة المطر منشعه في الحيطان عنده الراجل ده كبير في السن اسمه محمد عمره فوق 70 سنه الساكن طلع عالسطح عشان يصرف مية المطره فلما طلع لقي الطريق للمرزاب او الماسوره الي حتنزل منها الميه كان مسدود لان السطح ده كان عليه بقايا مواد البناء المتبقيه من وقت ما البيت اتبنى من6 سنين رمله واسمنت وطوب وخشب اكوام في كل حته فأخد خشبه من عالارض وبدأ يسلك الطريق للميه عشان تعدي فوهوا بيزيح الرمل من قصاد الماسوره لقي نفسه بيزيح جمجمه... فاصل الراجل للوهله الاولى اعتقد انها جمجمة حيوان مجاش في باله ان دي ممكن تكون جمجمه انسان فكمل ازاحه للرمل عشان الخشبه الي بيزيح بيها تطلع من تحت الرمل ببنطلون ازرق مليان عظام بشريه...... الراجل اتفزع رمى الخشبه من ايده وفضل ينادي عالجيران يمكن حد يسمعه لكن بسبب ظروف الجو محدش سمعه ولارد عليه فقرر انه ينزل بنفسه قسم شرطة برج العرب عشان يعمل بلاغ بالي شافه... اول مادخل القسم قال للظابط الحقو انا لقيت هيكل عظمي فوق سطح البيت الي انا ساكن فيه الشرطه اخدت بياناته وبسرعه فتحو محضر في نفس الوقت