ممنتج إحترافي (adobe) او برنامج متقدم
السلام عليكم ورحمة الله وبركاته.. يارب يكون يومكم سعيد وحياتكم طيبة وموفقة.
عزيزي الممنتج الفنان، عشان ما نضيع وقتي ووقتك يا غالي ومنعاً لأي إحراج بين الإخوان، ياليت تقرأ هالكلام حبة حبة قبل ما نتواصل، لأن (((أهم خطوة بالموضوع هي القراءة وفهم الطبخة))).
أنا طال عمرك أبحث عن مونتاج إحترافي فعلياً، والموضوع ما فيه مجاملات والمعذرة منكم يا أخوان. بالأسفل برفق لكم روابط من مقاطعي، ياليت اللي شايف في نفسه الجدية يراجعها دقيقة بدقيقة عشان يشوف طريقة الشغل. محتواي حالياً تقني وممزوج بالألعاب (النسبة الأكبر للتقنية)، ومستقبلاً بإذن الله ممكن نتشعب في مجالات ثانية ونفتح قنوات جديدة مثل السيارات والألعاب الإلكترونية.
أنا ما أبي أي تنازل في مستوى المونتاج؛ يعني إذا بيكون فيه تغيير مستقبلاً نبيك تأخذنا للأفضل والأعلى، أما مستوى أقل فـ المعذرة منك مرفوض.
معلومة إضافية تقريبا كل الي مروا علي يستخدمون capcut مستحيل يطلع بذا المستوى من المونتاج الرجاء وضع ذلك بالحسبان وان البرامج المستخدمه في مونتاج هذه المقاطع برامج Adobe بإحترافية
هذي أمثلة من مقاطعي الحالية والمونتاج المطلوب :
https://youtu.be/Wz_l-EZKE3g?si=AbhCL-Vw4CuR0-GN
https://youtu.be/2xGSK2AlGOw?si=CFphVEOs14DkzWvC
https://youtu.be/JATJGywStFI?si=T8jUQJpuh2SYXJLL
️ تعالوا نتكلم في "الشغل الصح" والعمل النظيف الراقي:
محتوى نظيف (0% أغاني): يعني يمنع منعاً باتاً وضع أغاني في الخلفية. نبي المحتوى نظيف، ومؤثرات صوتية مرتبة، وإنيميشن، وحركات بركات.
الجودة والدقة: مقاطعي ما تقل جودتها عن 2K و 4K حسب متطلبات المقطع. عشان كذا جهز نفسك إن مساحة المقاطع بتكون عالية جداً، وممنوع النزول في الجودة.
نظام ضغط الفيديو مرفوض: نظام تضغط الفيديو ويطلع بجودة سيئة ومبكسلة مرفوووض تماماً، خصوصاً لو كان المقطع عن كاميرا أو قطعة تهمنا فيها الدقة والوضوح.
خليك عملي: نبي شخص راعي شغل، يعني يكون فيه منتج وأصوره لك وتستلمه أنت وتطلع فيه بالمستوى المطلوب. ما ودنا بالتسويف، والتأجيل، والنسيان.. وأنت أكيد ما ترضى لأخوك يكون مستواه سيء فما ترضاها لي.
بيئة العمل والأخوة (أنا أدري إنها شروط زواج ذي يالأمير! بس من حقنا نكون مرتاحين)
الأخلاق قبل كل شيء: الشخص اللي بنشتغل معه نبي يكون محترم، أخلاقه عالية، غير استغلالي، ويقدر "العيش والملح".
ممكن تقول لي: "علي، وش دخلك محترم ولا مو محترم؟ أهم شي مونتاجه جبار!".. بأقول لك لأ يا غالي، تهمني راحتي وقبلها راحتك أنت لأن بتعامل معك بالمثل. أنا أبي شخص قبل المونتاج يحترمني ويحترم عقلي ويقدر العيش والملح. نعم، يعني بالعربي إذا المونتاج جبار وتنطبق عليك الشروط مستعدين نكمل ونستمر، والمحتوى كله بيكون عندك، لأن ما نبي شغل "تسليكي".
مخافة الله والثقة: نبي شخص يخاف الله في كل خطوة. في النهاية أنا أثق فيك وأنت تثق فيني والثقة متبادلة وما نبغى شي يخرب بيننا. وبدون بيئة عمل نظيفة وتعاون لا ترسل يا غالي.
أخ ورفيق درب: أنا أبي أخ وصديق ورفيق درب ما أبي مجرد ممنتج آلة. يعني إذا كانت السالفة مونتاج وبس دون أخوة واحترام وبيئة هادية، أنا أقفل قناتي وألغي محتواي أشرف لي! بهالطريقة والأخوة نقدر نسوي مقاطع ممتدة وأبغاك تعد الإنتاج اللي بيننا آخر شي.
الميزانية، الحساب، ومرونة الدفع (على المكشوف)
الميزانية محدودة: الميزانية ليست خارقة، لا تعاملني كأني وزير! ترا ممكن تكون ميزانيتي أسوأ من ميزانيتك، فما نبي توقعات فلكية. بالمناسبة، الممنتج السابق نفس الشيء كانت الميزانية معه محدودة (وهو لازال موجود معي الحين بس يمنتج أنواع معينة من المقاطع وفئة محددة، فمو شرط كل المقاطع تروح لك بالبداية، بس تأكد إنك إذا طابقت الشروط وأثبتّ نفسك بتكون الممنتج المستمر معي وممكن مستقبلاً يتحول الشغل كله لك).
حساب الدقائق: الحساب يكون على دقائق المونتاج النهائية وسعرها (يعني بعد القصقصة والمونتاج النهائي) وغير شامل للمقطع الأساسي الطويل. وبيني وبينكم، أي إطالة متعمده في المقطع بنكشفها لأن عندي شخص مخصص لمراجعة وتدقيق المحتوى.
بلاش نركز ع الفلوس في كل تفصيلة: ما ودنا بشخص يكون دايم همّه الأول والأخير "الفلوس الفلوس الفلوس" قبل أي خطوة أو تعديل بسيط، أو لو بغير شي، أو لو طلبت منك خدمة طفل يسويها تقول لي بفلوس! اللي بيصير بيننا كمسيرة عملية أسمى وأرقى بكثير من كذا. كلنا نحب الفلوس وما فيه أحد يكرها، بس وش فيه أحسن من بيئة عمل مريحة، محترمة، بدون ذنوب، راقية وهادية وفوقها فلوس؟ هنا يفرق الموضوع. طبيعي تطمح للمبالغ وهذا حقك، بس أنا أرفض التعطش الزايد، فإذا أنت من النوع هذا فحقك ومقامك على راسي بس لا تكتب لي وجزاك الله خير الجزاء.
الدفع مرن.. وش يعني مرن يا بو عزيز؟ مرن يعني الله يسلمك نعيد ونكرر إن موضوع الفلوس ما يشيل همّه؛ حنا بيننا بيئة عمل ممتدة وطويلة، وأنا ممكن فجأة يمر علي ضغط ظرفي وما أقدر أوفر الفلوس فوراً، فالمطلوب تمنتج وأنت واثق فيني مثل ما أنا واثق فيك، وكل هذا يندرج تحت بند الشخص المحترم المحب لأخوه. بهالطريقة نقدر نسوي مقاطع ونعطيك مبلغها بعد فترة، أو أقسطه عليك كل فترة، وممكن أعطيك إياها كاش على طول لأن السيولة متوفرة.. المبدأ إنك أخ وصديق قبل كل شيء.
مثال بسيط (عشان نفهم بعض وما يصير سوء فهم)
خلنا نكون واقعيين شوي ونفكر فيها مع بعض:
الحالة الأولى: لو طلبت منك تسوي لي مقطع قصير (ريلز أو شورت) مشتق من الفيديو الأساسي اللي أنت أصلاً منتجته (يعني مجرد تقص لقطات وتغير مقاس الشاشة للمقاس الطولي)، هل بتاخذ عليها مبلغ إضافي؟ نكون واقعيين، أنت ممنتج المقطع الأساسي والسالفة قص وتغيير مقاس، فإذا بتاخذ فلوس هنا فـ هذا يعتبر استغلال وتعطش مالي.
الحالة الثانية: لكن لما أجيك وأقول لك أبي مونتاج مختلف تماماً وخاص بالريلز بأسلوب يجذب ومؤثرات خاصة فيه، هنا من أبسط حقوقك الطبيعية والشرعية تطلب مبلغ (وإذا ما طلبت فهذا كرم منك)، لأن المونتاج هنا مختلف ومخصص للمقاطع القصيرة، وطبعاً ما تطلب مبلغ فلكي.
العينة وطريقة التقديم:
المعذرة على الإطالة يا حبايب بس الوضوح مريح.
بخصوص أعمالكم: ما عندي أي مانع وروني أعمالكم السابقة ويسعدني ذلك.
الاختبار الفعلي: الهدف الرئيسي إني برسل لك جزئية فيديو من عندي تمنتجها وتستعرض عضلاتك الإبداعية ولمساتك فيها عشان نشوف الشغل على أرض الواقع.
تمنياتي لكم بحياة ويوماً سعيداً ومباركاً، وفي انتظار المبدعين!
التعليقات (2)
