إزاي تعمل خدمة وتتقبل من أول مرة؟
إزاي تعمل خدمة وتتقبل من أول مرة؟
أول حاجة محتاج تعرفها قبل أي شيء إنك تحاول تخلي خدمتك مميزة أو غير تقليدية.
بس الأهم: إيه شروط قبول الخدمة؟
1- الصور
ممنوع منعا باتا رفع صور باستخدام الـAI حتى لو كانت صورة الغلاف.
طب إيه الحل؟
اعمل الـCover بنفسك على Canva، واستخدم Layers وعناصر وتصميمات من شغلك، وعدل عليه بطريقتك بحيث يطلع شكل مميز ويعبر عن الخدمة.
2- متعملش خدمة عامة
لازم الخدمة يكون فيها التفاصيل كاملة.
مثلاً لو هنعمل خدمة Data Entry:
متكتبش بس "إدخال بيانات".
حدد الأول:
إدخال بيانات على برنامج إيه؟
وليكن Excel.
وبعدين في الوصف:
هتدخل قد إيه؟
مثلاً 100 خلية مقابل 5$.
هل هو إدخال فقط؟
ولا هيكون فيه ترتيب وتنسيق للبيانات؟
ونوع البيانات إيه؟
مبيعات؟ استبيانات؟ بيانات عملاء؟ وهكذا.
كل ما الخدمة كانت محددة أكتر، ده بيزود فرص ظهورها وفهم العميل ليها.
3- المميزات
اكتب كل المميزات اللي فعلًا تقدر تقدمها للعميل، لكن بدون مبالغة.
4- معرض الأعمال
ودي نقطة مهمة جدًا.
الشغل اللي ترفعه لازم يكون أنت اللي عامله، مش من Google ولا شغل شخص تاني أو حاجة منسوبة ليك وهي مش شغلك، لأن ده ممكن يعرض حسابك للمشكلة أو الحظر.
5- العميل هيستلم إيه؟
وضح بشكل مباشر إيه اللي هتسلمه.
مثلاً في خدمة Data Entry:
"هتستلم ملف Excel منظم ومرتب وجاهز للاستخدام."
6- التطويرات
دي من أكتر الحاجات اللي ناس كتير بتتجاهلها أو بتغلط فيها.
متعملش تطوير لحاجة أنت أساسًا حاططها في الخدمة الأساسية.
وكمان لو هتقدم حاجة إضافية أو هتضاعف حجم الشغل للعميل، مينفعش تسعّر التطوير بشكل أقل من قيمة الخدمة الأساسية لنفس حجم العمل.
ودي تقريبًا أهم الحاجات اللي ممكن تقع فيها وأنت بتضيف خدمتك، وبعدها تلاقي الخدمة اترفضت وتفضل تسأل:
"أنا غلطت في إيه؟"
فحاولت ألخصلكم معظم الأسباب في بوست واحد.
التعليقات (12)
