حرق الأسعار على خمسات… مين الخسران الحقيقي؟
حابب أشارك معاكم حاجة بلاحظها بقالي فترة على خمسات، ويمكن ناس كتير مرت بنفس التجربة.
بيجيلي عملاء كتير جدًا يتكلموا، نسأل ونوضح تفاصيل ونقعد نرتب للدنيا، وفي الآخر مبيحصلش نصيب.
بصراحة أوقات بفكر:
هل المشكلة إن سعري عالي؟
ولا علشان مبقتش أحب أبذل مجهود كبير في تفاصيل ومناقشات وفي الآخر الموضوع يقف؟
ولا فعلًا السوق بقى فيه ناس بتقدم أسعار قليلة جدًا لدرجة تخلي العميل يقارن بشكل مش عادل؟
أنا عن نفسي مؤمن إن الشغل المحترم ليه سعره، وإن اللي بيشتغل بضمير ويهتم بالجودة طبيعي ميكونش الأرخص.
لكن في نفس الوقت أوقات الواحد بيحتار: هل العميل فعلًا بيدور على الجودة؟ ولا أغلب الناس بقت تدور على أقل رقم وخلاص؟
وفي رأيي إن موضوع حرق الأسعار مؤذي جدًا للسوق، لأنه بيخلي العميل يتعود على أرقام غير منطقية، وفي النهاية المتضرر الحقيقي هو المستقل اللي بيحاول يقدم شغل محترم ويعيش منه بشكل كريم.
الموضوع مش شكوى قد ما هو فضفضة وتجربة حقيقية حبيت أشاركها معاكم، ويمكن أسمع منكم تجارب مختلفة أو نصايح تساعدني أفهم السوق أكتر.
التعليقات (6)
