الحقيقة نقاط الضعف وإزاي ترفع خدمة صح حسب سياسات موقع خمسات

في الفترة الأخيرة ناس كتير بقت تعتمد على ChatGPT أو أي أدوات ذكاء اصطناعي علشان تفهم إزاي تشتغل على موقع خمسات.
بس السؤال المهم:
هل كل الكلام ده دقيق؟
الإجابة ببساطة: لا مش دايمًا.

ChatGPT ممكن يديك تصور عام لكن ما يقدرش يعوض سياسات خمسات الرسمية ولا التجربة العملية على الموقع وده بيبان بوضوح لما نيجي نطبق الكلام على أرض الواقع.

خلّينا نوضح الأساسيات الصح ونكشف الأخطاء الشائعة.

أولًا: نقاط ضعف الاعتماد على ChatGPT في خمسات
• مش متابع تحديثات سياسات خمسات أول بأول
• ممكن يقترح استخدام صور أو محتوى AI وده مخالف وقد يسبب إغلاق الحساب
• بيستخدم عبارات تسويقية عامة (جودة عالية – سرعة تنفيذ) ودي خمسات مش بيحبذها
• مش بيوضح تفاصيل مهمة زي المقاسات عدد الصور أو ترتيب الأولويات

علشان كده المرجع الأساسي لازم يكون سياسات خمسات نفسها.

الأساسيات الصحيحة عند رفع خدمة جديدة على خمسات

معرض الأعمال (أهم عنصر)
• عدد الصور: الحد الأدنى 4 صور
• المقاس الصحيح: 1700 × 970 بيكسل
• شرط أساسي: الصور تكون من شغلك إنت استخدام صور AI أو صور مسروقة = إغلاق الحساب
• لو هترفع فيديو: على الأقل 3 فيديوهات

ملحوظة مهمة:
مش كفاية تكون الصور “واضحة” لازم تكون احترافية ومناسبة لنوع الخدمة.

عنوان ووصف الخدمة

العنوان:
• مختصر
• مباشر
• يعبّر بوضوح عن الخدمة

مثال صحيح:

كتابة سكربت احترافي لقناتك على يوتيوب

الوصف:
• اشرح هتقدم إيه بالظبط
• من غير حشو
• من غير كلام إنشائي

مثال:

سأقدم لك كتابة سكربت مكوّن من 500 كلمة بأسلوب إبداعي يساعد على زيادة التفاعل والمشاهدات.

تجنب:
• جودة عالية
• سرعة تنفيذ
• ضمان
(دي بديهيات العميل متوقعها)

السعر
• لو لسه جديد:
ابدأ بـ 5 دولار
• السعر لازم يكون تنافسي
• بعد التقييمات تقدر ترفع السعر تدريجيًا

العميل لما يكلمك… إنت كده دخلت مرحلة الصيد

دخول العميل يكلّمك معناه:
• شاف خدمتك
• شاف بروفايلك
• مهتم

لكن خلي بالك إنت مش لوحدك
العميل غالبًا بيكلم 5 بائعين أو أكتر وبيقارن بينهم.

علشان تكسبه:
• رد بسرعة
• افهم هو عايز إيه قبل ما تجاوب
• ابعت له أفضل نماذج أعمالك
• ما تكررش أسئلة
• خليك مختصر وواضح
• سعر مناسب
• لو طلب حاجة بسيطة زيادة ومش هتتعبك → وافق

بلاش:
• كلام طويل
• ضغط
• وعود زيادة عن اللزوم

هل تقديم نموذج مجاني فكرة كويسة؟

أحيانًا آه…لكن خلي بالك
خمسات لا يفضّل تقديم شغل كامل خارج الطلب.

ممكن:
• توضيح فكرة
• مثال بسيط جدًا
لكن من غير تسليم شغل فعلي.

ليه الخدمة بتظهر أو تختفي في البحث؟

الخدمة بتظهر بناءً على عوامل أهمها:
• نشاطك على الموقع (تواجدك أونلاين)
• سرعة الرد
• التقييمات
• الكلمات المفتاحية
• قوة معرض الأعمال

علشان كده:
كونك متصل ومتابع بيزود فرص قبولك وظهورك.

لو لسه بتتعلم؟
• اشتغل وتعالى على نفسك في البداية
• ابنِ معرض أعمال قوي
• اتعلم التصميم صح (من الصفر)

ومع الوقت:
المعرض القوي = فرص أكتر = مبيعات أكتر

الخلاصة

ChatGPT أداة مساعدة لكن مش مرجع رسمي.

النجاح على خمسات محتاج:
• فهم السياسات
• تطبيق عملي
• معرض أعمال حقيقي
• تواصل ذكي مع العميل

ولو الأساسيات دي اتظبطت…البيع هييجي لوحده