دليلك الشامل لاستلام الأرباح بالدولار في مصر (QNB)
● قبل ما أبدأ حابب أوضح كذا نقطة :
- الشرح هيكون باللهجة المصرية بما أن الموضوع موجه للمصريين فقط
- الطريقة المشروحة هنا باختصار هي طريقة فتح حساب مصري في QNB ثم من خلاله فتح حساب دولاري تستطيع التحويل من عليه أو استلام فيزا تستطيع ربطها ببايبال واستلام أرباحك ،،، وهذا مختلف عن موضوع أ. سالي أنصحكم بقرائته أيضًا https://khamsat.com/community/stories/689729
- هذا الموضوع سيفيد فقط الأشخاص الذين لديهم دخل على الأقل 100$ في الشهر لأن أقل من ذلك أعتقد أنه
سيكون غير مُجزي بالنسبة له (ملهاش لازمة يعني)
- لو عندك أي استفسار مذكرتوش في الموضوع اكتب تعليقك ولكن رجاءًا عدم التواصل على الخاص
///////////////////////////////////////////////////////////////////////
◄ لمن هذا الحساب ؟؟
زي ما قولت فوق إنه للأشخاص اللي دخلهم أكتر من 100$ دولار علشان يقدر فعلا يستفيد - وبالنسبة للسن فهو لأي شخص عمره فوق ال 21 سنة
◄ الأوراق المطلوبة ؟؟
- لو طالب : ( كارنيه الجامعة - البطاقة - ومبلغ 1000 جنيه كحد أدنى لفتح حساب توفير )
- لو موظف : ( مفردات مرتب - البطاقة - إيصال مياه أو كهرباء أو غاز حديث - مبلغ 1000 جنيه كحد أدنى لفتح حساب توفير )
- لو فريلانسر بس : ( ورقة من أي محاسب قانوني لإثبات الدخل - البطاقة - إيصال مياه أو كهرباء أو غاز حديث - مبلغ 1000 جنيه كحد أدنى لفتح حساب توفير )
◄ الخطوات ؟؟
أول حاجة هتجهز الورق المطلوب حسب الفئة اللي انتا فيها وتروح لأقرب فرع ليك - تاخد رقم خدمة عملاء - هتقول للموظف حابب أفتح حساب توفير عندكم وهتكمل الإجراءات وهتروح تودع المبلغ في الخزنة
( أنا لما فتحت الحساب أودعت 2500 جنيه ولكن لما كلمت خدمة العملاء قالوا إنه ممكن 1000جنيه عادي ف خد معاك 2500 احتياطي )
هتستنى أسبوع تقريبا وتروح في الميعاد اللي قالهولك الموظف اللي هوا غالبا بعد أسبوع وتستلم الفيزا المصرية
هتكون بالشكل ده https://suar.me/QJOMK
وانت في البنك هتروح هتفعلها في ال ATM زي أي فيزا وتعمل باسوورد وكدا يبقى كمّلنا نص الطريق
هتنزل أبلكيشن QNB mobile banking وتسجل بالبطاقة وبيانات الفيزا زي أي تطبيق عادي
هتفتح قائمة الحسابات هتلاقي عندك حساب اسمه (EGP TAWFEER PLUS) ده الحساب المصري
هتضغط على فتح حساب جديد وتختار نوع الحساب (توفير) والعملة (USD) هيفتح معاك الحساب علطول ولو رجعت لقائمة الحسابات مرة تانية هتلاقي إن في حساب تاني ظهر اسمه (USD TAWFEER PLUS)
هيتم خصم تقريبا (1.95$) مصاريف فتح الحساب
لحد هنا تقدر تستلم فلوسك عن طريق التحويل البنكي من خمسات (الحد الأدنى 250$) أو أي موقع تاني أو حد يبعتلك على حسابك وهكذا
عن طريق إنك هتضغط على قائمة (الحساب المصرفي الدولي IBAN) وتاخد الرقم Copy وأي حد ممكن يحولك عليه أو تضيفه في الموقع
ولكن هنكمل علشان نستخرج فيزا دولارية على الحساب ده علشان نقدر نربطها ببيابال ونستلم من عليها أو نشتري من أي موقع بره مصر
◄استخراج الفيزا الدولارية ؟؟
عندك حلين:
- إما تخلي أي حد من أصدقائك يحولك مبلغ 30$ أو أكتر على حسابك برقم الIBAN اللي ذكرناه فوق
- أو يكون معاك دولار كاش حوالي 30$ مثلا أو أكتر وتروح البنك وتعملهم إيداع في الخزنة
بعدها وانتا في البنك هتطلب من موظف خدمة العملاء في البنك طلب استخراج فيزا دولارية وده لا يتطلب أي اوراق تانية خالص -
بتعمل الطلب وترجع بعد حوالي أسبوع برضو تستلم الفيزا الدولارية وده شكلها https://suar.me/vy1g6
(سعر الفيزا 15$ بيتم سحبهم من الفلوس اللي انتا أودعتها من شوية)
بعد ما تستلم الفيزا هتفعلها برضو في ال ATM وتحطلها باسوورد
◄الربط ببايبال ؟؟
كدا تقريبا آخر خطوة - هتفتح بايبال وتعمل إضافة فيزا جديدة وتكمل البيانات، بعدها تكلم البنك تطلب منه الكود المكون من 4 أرقام تكتبه وكدا الفيزا اتفعلت - ومتنساش إنك تخلي التحويل التلقائي عليها
◄ ازاي هسحب الفلوس بالدولار ؟؟
بعد نزول الفلوس من بايبال بتاخد حوالي 5 أيام عمل لغاية ما تظهر في حسابك وتقدر تتابع ده من الأبلكيشن
بعدها تقدر تتوجه لأي فرع من فروع البنك بالبطاقة الشخصية وتسحب المبلغ اللي محتاجه بالدولار
(( حابب أنوه برضو إنك لو تقدر تسحب من ال ATM ولكن هيكون بالمصري فأنصحك متعملش كدا ))
◄ هل المبلغ بينزل ناقص ؟؟
الإجابة لأ - نفس المبلغ اللي في بايبال بينزل في حسابك بدون أي نقصان
ولكن فيه مصاريف للحساب وهي تقريبا ما يعادل 45 جنيه بالدولار كل 3 شهور
///////////////////////////////////////////////////////////////////////
● وأخيرا كل المعلومات دي هي عن تجربة حقيقية وبالفعل سحبت من البنك ومكانش فيه أي مشكلة
فحبيت أشارككم التجربة وأتمنى إني أكون قدرت أجاوب على معظم أسئلتكم بخصوص الموضوع ده
ولو حد حابب يستفسر عن حاجة مقولتهاش في الموضوع يكتب تعليقه هنا وأنا هجاوبه عن أي سؤال إن شاء الله (( ولكن رجاءًا الرسائل على الخاص سيتم حظرها ))
بالتوفيق للجميع :)
التعليقات (31)
