ملخص طرق السحب بالدولار للمستقلين المصريين
بس السؤال ازاي نقدر نسحب , انا هقول تجربتي وهقول اللي عرفته من تجارب ناس تانية وي ريت اللي عنده معلومات اضافية يضيفها بحيث الكل يعرف .
طبعا كل الطرق علشان تسحب بالدولار بتعتمد انك تفتح حساب بنكي بالدولار في احد البنوك داخل مصر .
الطريقة الاولى :
انا مجربتهاش بس عرفتها من ناس كتير وهي حساب توفير بلاس الدولاري من بنك qnb واللي بتتيح استقبال الاموال بالدولار من باي بال وايضا ارسال الاموال الى باي بال , لكن اللي عرفته من تجربة اكتر من شخص ان فتح الحساب بيختلف من فرع للتاني , في فروع بتطلب حاجات زي سجل ضريبي واوراق , وناس قالوا انهم قدموا تحويلات خمسات الى الباي بال على نفس البريد الالكتروني اللي هتسجل بيه في البنك كإثبات للدخل ونفع , الطريقة دي على كلام اللي جربوها لو الكلام فعلا زي م قالوا ف هي كويسة جدا وخصوصا ان الحساب ده بيتصدر ليه فيزا وكمان بيقولوا مش عليه رسوم للسحب من باي بال ولا السحب من البنك نفسه , ف دي حاجة لو فعلا كده ف هي ممتازة جدا , ان شاء الله هروح اقرب فرع ليا واسأل ونبقا نشوف الطريقة دي بس بعد م نجرب التحديث الجديد في الموقع ونشوف نظام التحويل .
الطريقة التانية ودي انا جربتها شخصيا واللي بستخدمها حتى الان :
عندي حساب بنكي بالدولار في البنك الاهلي , بس طبعا مقدرتش اربطه مع باي بال علشان اسحب عليه لأن البنك مبيصدرش ليه فيزا , ف كان الحل اني استخدمت وسيط اللي هو payoneer بحيث اقدر اعمل من خلاله حساب بنكي امريكي اقدر اربطه بباي بال وبعد كده بضيف حسابي البنكي في مصر في payoneer وبقدر اسحب عليه , يعني عملية التحويل بتتم من باي بال الى بايونير ثم الى الحساب البنكي الخاص بي بالدولار .
طبعا الطريقة دي مشكلتها في الرسوم اللي تعتبر مش قليلة على كل عملية تحويل نظرا لفرق العملة بين الدولار والجنيه , علشان كده الاضافة الجديدة في الموقع هتكون كويسة جدا .
الرسوم اللي كانت بتتخصم من التحويل للي حابب يعرف لما بستخدم بايونير :
- بيتم خصم 1% على المبلغ المحول من باي بال الى بايونير بحد أدنى 1 دولار على كل 100$.
- وبيتم خصم 2% على عملية التحويل من بايونير الى الحساب البنكي بحد ادنى 10$ على ال 500$ فيما أقل , يعني اي مبلغ تحت ال 500 دولار هيتخصم منه 10$.
- ده غير طبعا الرسوم اللي البنك في مصر بيخصمها واللي بتختلف في كل مرة لدرجة اني مش قادر احددها كام ومحدش فادني في الجزئية دي ولكن بتكون في حدود 8$ الى 10$ على المبلغ المحول بافتراض انه اقل من 500$.
دي كانت تجربتي واللي عرفته حتى الان , نجرب التحديث الجديد وان شاء الله يكون تحديث موفق .
التعليقات (9)
