بالتفصيل الممل تجربتي في السحب بفيزا البريد المصري
تحياتي للجميع وكل عام وانتم بخير
ورمضان مبارك وتقبل الله منا ومنك الصيام والقيام وصالح الأعمال
احببت ان انقل لكم تجربتي مع فيزا البريد المصري
ربما تفيد أحد منكم , وطبعا اعلم ان خمسات الأساس في الحديث بها هو اللغة العربية الفصحى
لكن اعتذر مقدماً ان استخدمت بعض العامية المصرية نظراً لأن الموضوع موجه للمصريين فقط
أولا شراء الفيزا طبعا بعد مشاوير طويله لمكتب البريد تقريباً شهرين كل اسبوعين اروح اسأل
والفيزا مش موجوده لانها ما كانتش موجوده غير في المحافظات الرئيسية كالقاهرة والإسكندرية
وتقريباً باقي المحافظات ما كانتش متوفره إلا من فترة بسيطه
المهم من اسبوعين تقريباً رحت اشتريت الفيزا قيمتها 30 جنيه دي صورتها طبعا في كذا واحده لكن نصيبي طلع في دي شكلها يكسف بصراحة زي ما يكون كارت سبوع طفل
http://bit.ly/28dK54n
استلمتها في ظرف والموظف بيعمل تعبئة البيانات وانت واقف
بتاخد بس من الظرف ورقه سوداء مرسوم عليها ما يشبه الكود المهم الورقه دي بتفتحها من النص هي شكلها كأنها ورقه واحده لكن هي مجوز ومغلفه فبتقص الاطراف وبتفتحها بيبقى فيها الرقم السري الخاص بالبطاقة
بتشحن البطاقه بـ 100 جنيه وهو الحد الادنى للشحن
بعد كده بتتصل بالبريد على الرقم ده عشان تفعلها , هو رقم الإستعلامات شغال طول الأسبوع من الساعة 8 صباحاً الى 9 مساء
تقريبا بس يوم الجمعه في اختلاف بسيط في الوقت بس برده شغالين فيه بتسألهم على اى حاجه انت عاوزها
0235315900
حتى لو الموظف قال لك انه فعلها برده لازم تتصل لان غالبا الموظفين مش عارفين حاجه
ولو ما اتصلتش وجربتها على الباى بال ممكن يظهر لك خطأ وده اللي حصل معايا لاني سمعت كلام الموظف انه قالي انه فعلها المهم كلمتهم وفي خلال المكالمه تم التفعيل
المهم تم اضافتها للباى بال
وفيه مواضيع في مدونة خمسات ومدونة مستقل هتفيدك ان كنت لسه هتشترك وطريقة اضافة البطاقه
المهم بعد الإضافة باى بال هيسحب من البطاقه مبلغ تقريبا يور ونص
فبعد 24 ساعة تتصل تسالهم عن الرصيد وتشوف اذا تم السحب وتسأله عن رقم العملية وتضيفه في تفعيل البطاقه في باى بال وممكن يزيد عن 24 ساعة شويه لحد 48 ساعة
بعد كده بتحاول ترسل عليها من خمسات هيتم الرفض فبتتصل بالدعم الفني في باى بال
سيبك من الرسائل باى بال في رسائل ومكالمات لو استخدمت الرساله هتضيع وقتك لأنه هيبعتلك الرد ان الأفضل التواصل هاتفياً مواعيد العمل من الأحد للخميس من الساعة 9 تقريباً بتوقيت مصر لكن خليك في المضمون وكلمهم الساعة 11 ظهرا مثلا او بعدها
لانني كذا مرة احاول في اوقات تانيه وطبعا كل اللي حصل ان الرصيد خلص الدقيقة بـ 4 جنيه ^_^
يعني اعمل حسابك في كارت 50 على الاقل او 100 تشحن بيه التليفون
وملحوظة هتلاقي رقمين للدعم اختار العربي
بعد كده بتبعت من خمسات عادي وبتسحب على البطاقه
مدة السحب هتلاقي ناس تقولك يومين و3 انا كنت بتصل بيهم كل يوم اسأل على الرصيد والفلوس ما ظهرتش في البطاقه إلا بعد اسبوع بالضبط يعني حتى قبل مرور الاسبوع بساعات ما كانتش ظهرت
انا مش بكذب حد انا بوفر عليك المعاناه والقلق ان ده ممكن يحصل
بالنسبة للمصاريف فيه ثابت 5 دولار لباى بال عند سحب المبلغ مهما كان قليل ده اساس
البطاقه
المصاريف في الماكينة لا تذكر يعني تقريباً ممكن على الالف جنيه 8 جنيه مثلا
انا سحبت من ماكينة تابعه لبنك مصر معرفش نظام الماكينات الثانية ايه
البطاقات كلها هتنتهي في شهر 12 -2016 يعني لو اشتريتها شهر 11 هتخلص برده في 12 هي كلها نازله كده ومبرمجه على كده
الناس اللي ناوية تسحب مثلا مبلغ صغير خلاص الـ 6 شهور وليكن 100 دولار بلاش تعملها لان اللي هتصرفه في المشاوير والإتصالات ومبلغ السحب الأساسي في باى بال تقريباً هيساوي عمولة الوكيل على الـ 100 دولار
لكن لو هتسحب 200 فما فوق هتوفر معاك
انا كتبت وطولت في الموضوع عشان اعرف الناس كل التفاصيل عشان ما تقلقش
لأن من اول ما اشتريت الفيزا وانا مقلق منها خصوصا من شكلها ^_^
فحبيت اوفر عليكم القلق
وكل عام وانتم بخير
ولو فيه اخطاء املائية سامحوني كتبت كتير وكسلت اراجع ^_^
التعليقات (30)
