#لام_شمسية مقال فني نفسي بالعامية المصرية يمكن ده يكون أطول بوست هتقروه عن لام شمسية لكن لازم ندق على الحديد وهو سخن ونستغل حالة الوعي العظيمة اللي عملها العمل الفني الهادف ده لام شمسية لما جه يتسوقله في الأول اتقال بيناقش قضية التحرش بالأطفال بيدوفيليا واللي بالمناسبة ناس كتير زي حالاتي كانت أول مرة تقرا عن المصطلح ده خليني أقولك أن المسلسل أبهر الناس نفس انبهار الشخص اللي رايح محل يطلب برجر بخلطة معينة سمع عنها فاتفاجئ انهم منزلينله كمان حلو وساقع ولعبة وشوية حبشتكانات فلما العرض يفوق توقعاتك جرعة الانبهار بتكون أعلى بكتير وهو ده اللي حاصل الموضوع مش مجرد مناقشة قضية التحرش بالأطفال لكن المسلسل اتعرض لنقط كتير جدا مهمة اتعرض للأسرة اللي مش بيدعمها العطاء واللي بتقوم على الأنانية من أم خلعت من زوج سادي وسابت معاه وسام ابنها الأم اللي خلعت وسابته صغير وسافرت على ديل غالبا جالها في الخليج كونت بيه نفسها ورجعت عملت المدرسة اللي المفروض تأسس فيها أطفال كتير ده لو حقيقي صاحبة رسالة لكن الموضوع بالنسبالها كان كمالة البيزنس والأب اللي بيصب غضبه على طفل أمه سابته وجريت يقابل مصيره مع ايدين لمساتها للطفل وسام كانت مؤذية ومؤلمة بدل ما تطبطب وتحنن وتضم فطلع وسام عاوز يعوض ده بحضن أي كائن فيه نفس بشحاتة أي لمسة من أي حد يقدر يسلبه دماغه زي طفل أهله هاملينه أو بنت مامتها بتخدمهم أو سنتر فاتح مساج ومدورها ناقش زوجة اتعودت تشوف جوزها بيتفرج على أفلام مش كويسة ووارد بدرجة كبيرة بيطلب منها تنفيذ أمور غير مقدسة في العلاقة الزيجية زي ما بيتفرج وعلشان كده قالت لمامته آخر حلقة مش طبيعي ومش سوي وده بيخليها تهرب وتخاف وتكتئب زوجه وارد هي وبنته وهي صغيرة شافته بيلمس بنت الخادمة لمسات مش بريئة وبنته نسيت أو ما فهمتش والأم منسيتش وفضل ده عاملها تروما ناقش أن وسام مش شرط يكون مريض وضحية لكن هو منحرف sexual addict or hyper-sexuality disorder وده ظهر في الزوم على جسم بنت في سن بنته وعلى كاميرا حاطتها في أوضة بنته علشان يزوم براحته وده ظهر في كلمة زوجته ليه انت هتصدق نفسك لما قدام بنتهم سابها تصدق ان الام اللي حاطه الكاميرا مش هو علشان يبقى هو الملاذ الوحيد للبنت من الأم غير السوية ناقش النفور من العلاقة الزيجية لوجود تحفز مسبق لا إرادي يصحبه ألم لربطه بفعل سابق كان بيسبب ألم نفسي وشعور بالذنب لأنه بيتم في عدم وجود الأهل مع بنت الجيران وهنا عاوزين نفرق نفسيا بين الألعاب الاكتشافية اللي بتكون في سن أصغر لعبة الدكتور والعيان واللي فيها طفل بيستكشف جسم طفل تاني ويلمس جلده بايديه ويحس انه تمام الشخص ده من نفس الفصيلة بتاعتي واللي بيتطور بعدها لأم بترعب طفل دايما بالحقنة واللبوسة فيبتدي هو يعيد المشهد مع طفل تاني علشان يمارس عليه الألم النفسي اللي بيقع عليه لما بيخالف مامته وفيه اللي بيتطور بعد كده ويمارس الحنية اللي بتتمارس معاه لما بيكون تعبان بعد ما بياخد الحقنة أو اللبوسة وبيتحضن من مامته ويتقاله ما تخافش يا روحي مش هتحس بحاجة ده بس علشان تطيب وهنا بيحس بسعادة ممارسة الدور الأبوي كطفل على طفل تاني ودي غريزةالأمومة والأبوة البنت بتحاول من أول يوم تحس انها أم لعروستها الصغيرة بتكون الأول لعبة بريئة ومع أول نشوة بيحسها الطفل من الحضن ده وأنه بيعتني بشخص تاني وله الأبر هاند عليه بيحب يكررها بالرضا أو بالعافية وبالعافية دي ممكن تبدأ من مشهد يتشاف في إعلان لعبة من اللي ولادكم بيشوفوها على موبايلاتهم والطفل يحب يقلد فالمشهد الجاي بيكون انه بيقلد حضن مش مظبوط ولمسة غير مقدسة وحب لنفسه وطبطبة على نفسه لو مش بيلاقي ده من أهله ويوصل لاستكشاف أعضائه الخاصة بطريقة ممكن تكون عرضية لكن الإحساس اللي سببتهوله يخليه يكررها مرة وعشرة وألف ويبدأ في العادة السرية اللي النهاردة نشرتلكم ردي على واحد في جروب مشورة معلق خلله على ربنا والخدمة والبنات اللي الجواز منها محتاج فلوس كتير تقدروا تقروه مش هستعرضه هنا مش قضيتنا اتعرض لزوج اتعود يهرب حصل مشاكل في زيجته الأولى فطلقها ولما لقى مشاكل في الثانية قال بدل ما يطلق تاني ويبان فاشل قدام الأولى ما يعك عادي مش هيجرا حاجة اتعرض لأم كل اللي يهمها في الحياة صورتها سمعتها شكلها وشكل حفيدتها وسمعة مدرستها لدرجة لما ابنها خلاص اتعرى قدامها وبان انه غرقان في الوحل قفلت بابها في وشه ومفتحتلوش وسابته زي الكلب يشمشم ريحتها ويشحت منها حضن اتعرض للرجل الشرقي اللي ولا كأنه سمع حاجة تقرف حصلت لخطيبته وقالها ياستي ما ربنا ستر تفضحي نفسك ليه وكأن اللي حصل فضيحة ليها مش جريمة تستحق ملاحقة مجرم اتعرض لفكرة ان وجود شباب مع شاب بيبين دايما انه مقطع السمكة وديلها ومتعدد العلاقات في جامعة ممكن يعدي الشلة لا شعوريا ويبينلهم ان تعدد العلاقات دي رجولة ولما يكبروا ويتاح ليهم ده يقلدوها زي ما عمل طارق اتعرض لفكرة ان زوجة الأب مش دايما وحشة وده ظهر في حالتين البطلة وزوجة أبوها وازاي كانوا داعمين لأسرهم ومصحصحين اتعرض لفكرة ان المؤذي والمتحرش مش شرط يكون بيبرق ولا يزعق ولا يخوف ده هتلاقيه بيقنع وبيدادي ويحايل ويهادي ويجيب بلاي ستيشن وبيوزع نجوم ويعمل ساحر علشان يسلبك دماغك اتعرض لأن حتى الأنشطة الفنية لو مش برقابة ممكن تسبب عقد نفسية مشرف يفضل طفل على طفل علشان يغيظه .. مدرسة كل اللي هاممها الجملة ما اتقالتش صح ليه مش ايه اللي ملخبط اشطر حد في فريقها اتعرض لفكرة الطبيب النفسي اللي بيسمع ما وراء السطور وبيفهم مريضه وبيوجهه صح وبيراعي خصوصيته الطبيب الواعي مش اللي دايما الدراما زمان بتطلعه هو نفسه سايكو اتعرض لفكرة الحيل النفسية والتلاعب والبراعة في لوي الحقائق الزوجة هي اللي مهملة في بنتها ونايمة طول الوقت مش هو اللي مديها ادوية بتغيبها زوجة الأب هي اللي مجنونة وباعتراف زوجها وبيتهيئلها حاجات مش سوية بقى تصدق واحدة مش عارفة أصلا تنجح علاقة اتعرض لأم تنصلت من مسؤليتها كأم وسابت ابنها مع مرات أبوه لأنها شايفة نفسها أقل من انها تشيل مسؤولية يوسف اتعرض لمشكلة دفن الراس تحت التراب من خطيب المدرسة اللي تم الاعتداء عليها ومن أم اسماعيل اللي قررت تتجاهل اللي اتقالها المهم ما تفضحش ابنها زي ما نيللي عملت في ابن جوزها اتعرض لمشكلة ان بعض الجرائم جروحها أعمق من ان تثبت بقرائن تسهل الاقرار بحتمية إدانة فاعلها زي ما القاضي التالت ضميره مكنش مريحه لأن القرائن اللي شافها تبين ان الشخص عنده خلل لكن ما تثبتش انه قام بالواقعة مع الطفل ده تحديدا ما يمكن بيتبلوا عليه المحامي قال كل ده غل من مامة المتهم المديرة اللي أذتها اتعرض لقضية الجيران والأخوات والأقارب الدرجة الأولى اللي بيتسابوا مع بعض ويتقفل عليهم البيبان وبيكتشفوا بعض أو بيقلدوا حاجات شافوها وسمعوها في بيتهم أو في إعلانات بتجيلهم على تطبيقات أو بيمارسوا لعبة اتمارست معاهم ولما ميلاقوش رقابة ولا حد بيسأل بيكرروا الاكتشافات دي لحد ما تبقى عادة وإدمان واعتداء يومي متكرر زي ما حصل مع نيللي خلوني أخدكم لنفس الواقعة في بيت متوسط الحال لأهل مدخلين ولادهم مدارس حكومية بالكاد الأب والأم شغالين كذا شغلانة علشان يلاحقوا على المصاريف الأم دخلت لقت أخين بيعملوا مع بعض كده هل تقدروا تكملوا السيناريو بنفس هدوء بتعملوا ايه واللا كانوا اتعجنوا واتلسعوا واتحرقوا واترهبوا وإياكم حد يعرف بالأرف ده ولا كان حد هيروح لدكتور نفسي ويتم اكتشاف السبب والاعتذار للمجني عليه لو بنت حكت لمامتها حاجة زي كده كانت هتسمع اخرسي أوعي تنطقي مسمعش حسك وانتي السبب وإزاي تسمحيله او تسمحيلها تعمل فيكي كده ومسمعش نفس عن الفضيحة دي مكانوش هينتبهوا ان الهروب من الأنشطة والعنف والزعيق والاكتئاب وراه حاجة سببت تبول لا إرادي انتوا عارفين انهم كمان مش بعيد كانوا يعايروا الشحط اللي لسه بيعمل فطاير على المرتبة أتمنى المسلسل يكون وصل لكل الطبقات وأتمنى تتناقش برؤية مختلفة مع الطبقة المتوسطة والطبقة المعدومة في السنين الجاية وأنا أتمنى من قلبي أغنية التتر الختامي تكون عن عمد من صناع المسلسل لأنها خدته لبعد تاني خالص عميق بحكم القضاء اللي عرف يحمي مستقبل الوطن وسلامة البلد دي من سلامة أطفالها لــلــعُــلا أبــنـاءَ مـصــرٍ لــلــعُــلا وبـمـصــرٍ شـرِّفُــوا الــمـسـتـقــبـلا واسـلـمـي فـي كــل حــيـن
