بوست قصصي بالعامية المصرية
قالي يلا نبيع الشبكة وادفعه مقدم لعربية حديثة علشان اشغلها ف اوبر. قولت اوك بس انت دارس المشروع كويس؟! لأن دي حرفيا كانت اخر فلوس معانا وخسارتها معناها أننا خسرنا كل حاجة.
كل اللي طلع عليه وقتها حاجتي دهبي وشويتين ويقول سيغتي اللي باشخلل بيها وانتي مش من حقك اصلا ترفضي
قولت يمكن الموقف العدائي ده ممكن يكون بسبب أنه حاسس اني باذله بفلوسي. فوضحت له انها فلوسك وكل حاجة (وينك وينك) بس علشان اقساط البنك هتبقى بفائدة وهل المشروع هينفع يسدد كل ده؟! قالي مالكيش فيه.
قولت براحته بقى خليه يجرب. باع الدهب. واشترى العربية الجديدة لانسر فضي ودبحلها وفرشها. ويلا بقى يا حبيبي شغلها.
قالي باباه مش راضي. حلو اوي والعمل؟! أبوه (عليه من الله ما يستحق) قالي وبمنتهى العصبية ساعديه من مرتبك وسددي القسط. (أيوة زي ما بأقولكم كدة) وقتها كان مرتبي كدكتورة ١٨٠٠ جنيه وقسط العربية ٣٢٠٠ جنيه!
يعني حتى لو عيشنا ع البناء الضوئي. برده مرتبي ما يكفيش. تقريبا الحج كان عايزني ارتشي باين. أو أنا اللي اشتغل بعد الظهر علشان أسدد.
قولتلها تمام ١٨٠٠ جنيه معاكم اهوه. اكلوني وشربوني واكسوني وادفعوا قسط العربية. طبعا أسقط في أيديهم وخلاص. وباباه اداله الموافقة على أنه يبقى سواق اوبر.
الغريبة أن أهله كانوا بيقولوا لي ازاي جوزك يبقى سواق وانتي دكتورة؟! قولت لهم مش مشكلة المهم أنه يشتغل ويكفي بيته. وايد لوحدها ماتسقفش اللي هي ايدي أنا طبعا
طبعا وكما توقعت المشروع فشل لأن قيمة القرض أعلى من قيمة اللي بيدخله المشروع. وكانت النتيجة أنه باع العربية بأقل من قيمتها. والغريبة بقى أن باباه خاصمه علشان باع العربية. مع العلم أن الوالد الغالي اللي مناخيره فوق ف العالي كان معاه يسدد له القرض ويجيبهاله كاش توتو على كبوتو لكن هو كان مصمم يعتمد عليا. أيوة أنا كتبتها صح مش على نفسه لا عليا. مش عارفة الناس دي كانت عايزاني ابيع ايه تاني
وخلال فترة العربية كان ناقص ابوس أيده علشان يشغلها شوية وده كان من أسباب فشل المشروع برده التكاسل والتخاذل.
العربية كمان كان ممكن يستلفها كل من هب ودب ويوصل بيها العيلة وعيلة العيلة ماعدا مراته سابقا وطليقته حاليا اللي هو أنا وبنته اللي كانت ف الوقت ده طفلة رضيعة لا يتعدى عمرها العامان متمرمطة بيها ف المواصلات والحضانة علشان اروح الشغل واجيب فلوس تصرفها عليه وعلى نفسي وع البيت وبالمرة السيارة.
وبتسألوا مين يركب قدام يا دكاترة....
أبسوليوتلي أنا ف حوار السيارة أنا شخصيا اللي اتركبت....
بس ربنا ماضيعش كل ده وانتقم منه ف الدنيا أشد انتقام....
والعذاب الآخرة أكبر لو كانوا يعلمون....
لو حطيتولي كومنتس كتير هاكمل....
واهو الواحد بيفضفض....
العلاج الاجتماعي....
التعليقات (2)
آخر المساهمات
