السلام عليكم،
- أسمي محمد حسين, مبرمج و مطور خلفيات مواقع Back-end PHP & Laravel Web .

بصراحة كنت حابب أتكلم معاكم عن مشكلتي بخصوص خمسات، خاصة خدمات البرمجة. من زمان وأنا ملاحظ إن الطلب على خدمات البرمجة على الموقع ضعيف جدًا، وده كان سبب إني ابتعدت عن المنصة لفترات طويلة. و من بضع ايام, قولت ارجع القي نظره, يعني كل مرة أرجع وأقول يمكن الوضع اتحسن، ألاقي نفس المشكلة موجودة: مفيش عملاء للبرمجة!

يمكن الوضع مختلف في أقسام تانية زي التصاميم والكتابة والمونتاج، اللي واضح إن عليها إقبال كبير. لكن بالنسبة للبرمجة، بقى نادر جدًا ألاقي حد بيطلب خدمات، سواء تطوير مواقع، تطبيقات، أو حتى برمجيات بسيطة. بصراحة، ده مخليني مركز أكتر على العملاء خارج خمسات، سواء من مواقع فريلانسر تانية أو علاقات مباشرة.

وهنا ييجي سؤالي: هل المشكلة دي عامة؟ هل فيه مستقلين تانيين في مجال البرمجة بيواجهوا نفس المعضلة؟ ولو فيه مستقلين جدد، هل قدرتوا تلاقوا عملاء بسهولة؟ ولا نفس العقبة موجودة؟

أنا شايف إن المشكلة الأساسية هي إن المنصة محتاجة ترويج أكتر لجذب عملاء مهتمين بمجالات مختلفة، مش بس التصميم والكتابة. يعني ليه مفيش حملات إعلانية تستهدف أصحاب الشركات أو الأفراد اللي ممكن يكونوا عايزين خدمات برمجية؟

في الآخر، عاوز أعرف رأيكم: هل الحل إننا نتكيف مع الوضع ونروح لأقسام تانية؟ ولا المفروض يكون فيه دور أكبر للمنصة في جذب نوعيات مختلفة من العملاء؟ شاركوني أفكاركم وتجاربكم، يمكن نوصل لحل أو فكرة تساعدنا كلنا.