سحب 400$ من باي بال بواسطة فيزا البريد (ايزي باي )
الموضوع دا فيه كل التفاصيل عن كيفية سحب فلوسك من الباي بال بواسطة فيزا ايزي باي من البريد (أفضل حل للسحب حاليًا)! من أول ماتشتريها لحد ماتستلم الفلوس كاش في ايدك عن تجربة... بسم الله :"
- أول حاجة بتروح أي مكتب بريد قريب منك ويفضل يكون المكتب الرئيسي، لو مش عارف مكانه خش على جوجل واكتب "مكتب البريد الرئيسي في (اسم المنطقة بتاعتك)" هيطلعلك العنوان على جوجل، هتاخد معاك صورتين بطاقة و25 جنية واما تملى البيانات مع الموظف وتخلصها، اتصل وانت واقف ب16789 من موبايلك واختار تفعيل البطاقة واللي هيرد عليك هياخد منك شوية بيانات من الفيزا والبطاقة وهيقولك تم تفعيلها، هتقف من 15 - 30 دقيقة لحد ماتتفعل (ممكن تخش تتأكد من أي شباك هي اتفعلت ولا لسا) وبعد كدا هتخش الفرع تاني تسأل عن مكنة pos عشان تعمل ايداع، وهتودع 100 جنية عشان تفعيل باي بال (باي بال بيخصم حوالي 40 جنية ويبعت بيهم الكود بتاع تفعيل الفيزا عليه، لكن مش هينفع تودع 40 جنية بس بتاعت تفعيله، لأن أقل مبلغ ابداع لفيزا ايزي باي هو 100 جنية) فهتودعهم.
- بعدين تروح البيت تعمل أكونت باي بال وتخليه باسمك الحقيقي بالانجليزي (الأول والأخير عادي برضو)، وتملى باقي البيانات وبعدين تفعله أول مرة من الرسالة اللي هتجيلك على ايميل الياهوو أو الجيميل اللي عملت بيه باي بال، وبعدين تربط البطاقة عليه بأنك تدخل رقم البطاقة وتاريخ انتهائها وال3 ارقام بتوع الccv اللي على ضهر البطاقة في مكان أضافة البطاقات في باي بال، وبعد ماتتربط وتلاقيها ظهرت في أكونتك هتضغط عليها وبعدين تضغط على Confirm Card وتأكد التفعيل، هيقولك تم خصم مبلغ صغير واحد ونص يورو اللي هو تقريبا 35 جنية، هتستني نص ساعة بالكتير من بعد مافعلتها، وهتكلم البريد تاني من التليفون أو الخط الأرضي (أرقامهم 16789 و0235315900 والأخير دا اتصلت بيه عالأرضي عادي) وتقولهم انك عايز الPP كود بتاع آخر معاملة، بيظهر عالشكل دا عندهم PP*1234CODE هو دا الكود بتاع التفعيل اللي انت عايزه بيببقى مكان ال1234 دي! هتاخده منهم ولو قالوا مظهرش لسا عندنا قولهم راجعوا آخر معاملة بس عندي وزن عليهم لو فضلوا يقولوا مظهرش مظهرش مع انه بينزل في وقتها اتصل بليل او تاني يوم وخلاص.
- المهم بعد ماتجيبه منهم هترجع لباي بال تضغط عالبطاقة اللي ربطتها وهتلاقي مكان ظهر عشان تحط فيه الكود دا، هتضيفه وتضغط تأكيد وكدا خلاص حسابك بقا متفعل، بالنسبة للمبلغ اللي خصموه منك (ال35 جنية بتوع التفعيل) باي بال بيرجعهم خلال 24 ساعة من التفعيل بس هيظهروا بعدها من 3 - 7 ايام عالفيزا بالكتير يعني ال100 جنية هترجع تاني زي ماهي بس هتبقى ناقصة اتنين جنية تقريبا.
- وحاجة أخيرة بعد ماتدخل الكود وتفعل أكونتك خش على "Contact Us" أو "أتصل بنا" هتلاقيها تحت كدا في صفحة حسابك على باي بال وبعدين اختار "Message Center" أو "مركز الرسائل" وبعدين اختار "Compose" أو "كتابة رسالة" تقريبا، هيحولك على صفحة مراسلة الدعم فهتختار اي موضوع له علاقة بالسحب اي حاجة مش مهم، بس في خانة الرسالة هتكتبلهم: "Hi, I've linked my VISA card & confirmed it with the 4-digit code I received on my card statement, now I'd like to start receiving money on my PayPal account, so can you please confirm that my account is in good standing and is capable of receiving and withdrawing money? Thanks" دا عشان تتأكد انهم فعللولك خاصية السحب والاستلام على اكونتك لأن ساعات لازم يعملوها يدوي مش بتتفعل تلقائي من عندهم... هيردوا عليك بعدها بيوم يقولك حسابك دلوقتي في أحسن وضع ويقدر يستلم أموال ويسحب عالفيزا وكله تمام.
- بالنسبة بقا للسحب فلما تسحب عالفيزا هيفضل قيد الانتظار "Pending" في باي بال لمدة 24 ساعة وبعدين يظهر Completed، وبعدين هياخد بقا من 3 - 7 ايام برضو عشان يظهر على الفيزا، المتوسط بيبقى 4 أيام بدون الاجازات اللي هي جمعة وسبت، فمتتخضش لما تلاقيها اكتملت في باي بال ولسا مظهرتش عالفيزا.
- باي بال بيخصم 5$ عمولة على أي مبلغ مهما كان حجمه ولكن ال5$ دي بتقدر ترجعها لو سحبت خلال ال4 أيام الأولى من الشهر، بتكلم الدعم وتطلب منهم يرجعوا ال5$ رسوم التحويل لأنها بتبقى مجانية مرة واحدة أول الشهر.
- بالنسبة لحدود سحب الفلوس من باي بال للفيزا فمفيش أي حد للسحب (مش زي مامكتوب عليها ان الحد الاقصى 5000 جنية في اليوم و20 الف في الشهر، لأ دا الحد الأقصى للايداع اليدوي في اليوم انما باي بال بيتعاملوا معاها على انها حوالة عادي وبتوصل كلها)، فيه ناس جربت لحد 1200$ ووصلوا وسحبوهم عادي، لكن السحب الكاش بيبقى له حدود من الatm يعني آخرك 3000 جنية في اليوم وبيتسحبوا على مرتين كمان لأن المكنة مش بتطلع أكتر من 2000 جنية في المرة للفيزا دي، فهتسحب 2000 وبعدين 1000 وانت واقف، السحبة الواحدة بتخصم منك 3 جنية والاستعلام 2.5 جنية.
- اسحب من اي atm في مصر ماعدا بتوع بنك اسكندرية وبنك HSBC دول مش بيتعاملوا مع البريد.
- الدولار بيتحول مصري وينزل عالفيزا بسعر البنك المركزي اللي هو تقريبا 17.50 ل17.60 جنية، واللي بيخلي الفيزا دي الأفضل حاليا للسحب من باي بال نظرًا لأنها كدا ملهاش أي رسوم تقريبا مقارنة ببايونير وبايسيرا واللي كانوا عاملينه فينا.
- الفيزا صلاحيتها 5 سنوات وكل سنة لها مصاريف 15 جنية فقط، مبيبقاش عليها اسمك ولا السهم اللي بيقولك تدخلها ازاي في الatm لكن انت هتدخلها بحيث: شعار VISA يكون تحت عالشمال وشعار البريد المصري يكون فوق عاليمين.
- ممكن تسحب فلوسك من مكتب البريد من غير ماتدفع ال3 جنية رسوم بس هتستنى في الطابور شوية حلوين :" وممكن تستعلم عن الرصيد اللي عالفيزا من خدمة العملاء بالرقمين اللي ذكرتهم فوق.
- تقدر تشتري بيها اونلاين بما يعادل 10 ألاف جنية في اليوم الواحد، أو 200 دولار في اليوم الواحد بحد أقصى 1000$ في الشهر للمواقع الأجنبية.
- مجربتش أتعامل بيها عالفيس كممول فمش عارف تنفع ولا لأ بس مش شايف اية اللي يخليها تترفض هي فيزا مشتريات في الأول والآخر، وأنت بتشتري خدمة من الفيس بوك.
بس كدا دي كل الخطوات بالتفصيل عشان تفعل الفيزا وتستلم عليها.
اولا مبروك تفعيل حسابك والسحب منه ثانيا شكرا لحضرتك وللمقاله المفيده ثالثا لو سمحت هى الفيزا بتكون من غير اسم علشان انا عملت الفيزا النهارده ومش مكتوب عليها اسمى انا كنت باستخدم فيزا بنك تجارى وفا وكان اسمى مكتوب على الفيزا لكن حبيت اغير لانى زهقت من العمولات اللى بيخصموها.
شكرا جدا لحضرك المقال فعلا مفيد جدا وفيه شرح مفصل، ولكن أنا عضو جديد وحاسة ان الخطوات والتفاصيل دي من كترها مخلياني تايهة ومتلخبطة. انا لسة مقدمتش خدمات على الموقع، فإيه أول خطوة أخدها فيما يتعلق بسحب الرصيد، هل أستنى أعمل خدمات الأول ويبقى عندي رصيد ولا أعمل حساب pay pal لاني لسة معملتوش! أفيدني أفادك الله. شكرا مقدما.
اسف اخواني علي الرد المتاخر ولكن كنت مشغول بشئ اخر KareemMagdy يفضل الفرع الرئيسي لاني ذهبت الي الفرعي واكتشفت انها غير موجودة ولا احد يعرف عنها شئ قم بزيارة الفرع الرئيسي وستحصل عليها انشاء الله
ضياء البنهاوي :- ماذا تقصد اخي الكريم تضع تاريخ ميلادك فين؟ -------------------------------------------------------- أسماء رفعت محمد :- اهلا بحضرتك اعملي حساب باي بال عادي مفيش مشكلة وبعد كده قدمي خدماتي وانشاء الله تربحي فلوس
اتا اتبعت خطواتك وفعلا اشتريت الفيزا وربطتها بباي بال وأكدتها بالكود بتاع المعاملة وكله تمام وحولت جزء من ارباحي على خمسات الى باي بال ووصل الرصيد الحمد لله في أقل من ساعتين.
بس أنا عندي سؤال ، 1.5 يورو اللي باي بال سحبهم من الفيزا مجاليش اشعار انه رجعهم. أعمل ايه في الموضوع ده
ليس هناك اشعار اخي , ولاكن لا تقلق الباي بال يخصم 1.5 يورو وعند تفعيل الفيزا يرجعهم لك فورا واذا اردت التاكد اتصل بخدمة الدعم الفني للبريد واستعلم عن رصيدك
اول الشهر هيخصمو 5$ بس انت ممكن تراسلهم من خلال كلمة اتصل بنا في الاسف وهيرجعولك ال 5$ بس شرط يكون في اول الشهر وبالنسبة لل 2.25$ دول عمولة باي بال عند تحويل الاموال مش بيرجعو تحياتي
أحمد مصطفي إبراهيم : لو سحبت مبلغ اكبر من 7 الف جنيه حقدر اسحبهم من البريد مباشرتا من الشباك ولا لازم atm وهل ممكن اسحبهم كلهم في يوم واحد ولا على اكثر من يوم ( البطاقة حدها 5 الف في اليوم ده صح ولا لا )
اهلا بك اخي الكريم الحد الادنى للايداع فى الكارت 100 جنية والحد الاقصى للايداع خلال الشهر 20 الف جنية متاح خدمة السحب النقدي من خلال ماكينات البريد المصري والمكينات ATM التي تحمل شعار 123 بحد اقصى 3 الاف جنية يوميا
مرحبا اخي احمد كنت عايز استفسر عن عموله باي بال لما ارسل اموال لحدلو عندك فكره عنها ؟ تاني حاجة انا مفعل السحب الاتوماتيكي اول الشهر .. هل لازم برضه ارسل طلب للسحب يوم 1 ف الشهر ولا باي بال بيبعتهم عشان انا مفعل السحب الاوتوماتيكي ؟
اهلا بك اخي الكريم لما ترسل اموال لحد تقريبا بيخصمو في حدود 2.5 دولار او اقل تقريبا السحب الاوتوماتيكي غير مفعل في مصر اسحب اول يوم في الشهر بعد كده راسلهم عشان يرجعولك ال 5$
بجد شكرا ليك انا استفدت جدا من الموضوع والحمدلله عملت الفيزا ... بس كنت عايز افهم موضوع ازاي استرجع مصاريف التحويل يعني اعمل التحويل خلال اول ٤ ايام ف الشهر وبعد كده ابعت ميل لباي بال اطلب استرجاع مصاريف التحويل .. مظبوط كده ؟؟ ولو مظبوط ممكن تبعت لي الصيغه بتاعت الميل دا او الطلب دا .. شكرا ليك
العفو اخي الكريم تحت ام حضرتك بخصوص التحويل بيتم اول 3 ايام في الشهر وليس 4 بعد كده تطلب من فريق دعم باي بال تقول لهم هكذا اي صيغة مش مشكلة "السلام عليكم سحبت ملبغ وقدره $$ في اول الشهر وتم خصم 5$ عمولة اريد استراجع هذه العمولة لاني اعيش في مصر والسحب الاوتوماتيكي غير متوفر في مصر نظرا لقوانين البنك المركزي وشكرا لكم"
السلام عليكم ورحمة الله حصلت معى مشكلة وهى انى فعلت الفيزا فى البايبال وكله تمام بس لما اجى اسحب الفلوس ترجع تانى لحسابى فى بايبال ويقولى card refund الكلام ده حصل مرتين وراسلت الدعم الفنى للبايبال يقولى كلم خدمة عملاء مقدمى الفيزا وخدمة عملاء البريد يقولولى الفيزا مفيهاش حاجة
من اى مكتب بريد تحديدا اشتريت الفيزا وهل من سحب ال 1200 دولار تمكن من استلام ما يتخطى ال 20 الف جنيه فى يوم واحد هل ممكن تسأله كم استغرق سحبهم وقتا ومالا هل ممكن استلامهم دفعه واحده من داخل المكتب بدون اللجوء للماكينة ؟
اخى احمد مصطفى لازم ابعتلهم رسالة لانى هما بعتولى على الجيميل الرسالة دى(مبروك! لقد تم الآن رفع حد السحب الخاص بك. يمكنك الآن سحب أموال غير محدودة من حساب PayPal الخاص بك. ) ارجو الرد اخى الغالى
للاهمية يا جماعة انا دخلت اربط الكارت على حسابي رفضم كارت البريد المصرى مش عارف هل انا عملت شيئ غلط و لا ايه الحكاية ظهرت الرسالة دى This card is not accepted. Please use a different card.
الفيزا انا شاحنها ب100ج حاضرتك تقصد اني اسحب ال100ج؟ولا اسحبها ازاى من فضلك ممكن توضيح؟ كمان هما طلبين من اثبات العنوان دى الرسالة نشكرك على الاتصال بـ PayPal بشأن القيد.
اسمي ميشيل وأنا أكثر من سعيد لمساعدتك اليوم!
لقد راجعت حسابك ونريدك أن تقدم وثيقتين منفصلتين ، واحدة لـ ID والأخرى لإثبات العنوان.
لتحميل المعلومات ، انسخ الرابط التالي في متصفح الويب الخاص بك واتبع التعليمات:
سيتم قبول أي من المستندات التالية على أنها صالحة لإثبات العنوان:
كشف مالي (على سبيل المثال ، بيان من بنك / سي سي ، خطاب الرهن ، تجديد البطاقة) فواتير الخدمات العامة / الهاتف المحمول (مثل الغاز والكهرباء والمياه) إثبات الإقامة فاتورة التأمين أو نماذج التجديد فاتورة الإيجار الصادرة عن البلدية / السلطة العامة payslip المطبوعة رخصة القيادة / بطاقة الهوية الوطنية (يمكن قبولها ما لم تستخ
جزاكم الله خيرا.. استفسار بسيط للتأكد فقط، الفيزا اللى بناخدها فى أيدينا هى فيزا الeasy pay أما الباى بال التعامل معها يكون من خلال موقعهم فقط على النت؟
شكراً جزيلا لك أخى الكريم قمت بشراء الفيزا وتفعيلها فى مكتب البريد فى أقل من ساعة وعند العودة للمنزل قمت بربطها ب باى بال واتصلت بدعم البريد للحصول على PP code واعطونى اياه فى 5 دقائق فقط ثم راسلت باى بال فالرسالة التى كتبتها وقاموا بالرد على فى خلال ساعة ان حسابى يمكنه ارسال واستلام الاموال شكرأ جزيلا لك على التجربة الايجابية
التحويل بيكون حسب سعر البنك او ماكينة البنك اللى بسحب منه انا سحبت امبارح من ماكينة البنك الاهلى حسبو االدولار 17,78 لكن لو سحبت من ماكينة مثلا الcib حسحب الدولار ب17,83
السلام عليكم, اواجه مشكلة فى سحب اموالى من حسابى على باى بال الى بطاقة ايزى باى اتبعت جميع الخطوات.
تواجهنى مشكلة فى مراسلة باى بال : عندما اراسلهم لا اعلم اين اتلقى الرد ؟ لا اجد صفحة مخصصة للتذاكر التى قمت فتحها او ما ارسلته ولا اتلقى رد على بريدى الالكترونى ! لا اعلم ما المشكلة ! علماً بان حسابى بيزنيس و ليس شخصى و اتلقى مدفوعات يومياً من مواقعى و اعمالى و الحساب مفعل بفيزا انترو باى ابضاً.
بعد 4 ايام من وضح امر السحب يتم الغاؤه ولا اعلم اين اتواصل مع باى بال منذ فترة طويلة لم اتواصل معهم و لكن كنت اذكر انه يوجد صفحة بها استفساراتى و ردودهم ..لا اجدها الان للتذكرة : حسابى بيزنيس و ليس شخصى
سلام عليكم هل تم حل مشكلة السحب باستخدام بطاقة ايزي باي ؟ كانت متوقفة طوال الفترة السابقة من قبل البريد هل حد جرب يستلم ارباح فى اول الشهر 9 و ماذا كانت النتيجة ؟
ما مصير الاموال اذا حولتها على البايبال ولم استطيع سحبها من الفيزا هل يمكن تحويلها لبايبال شخص اخر؟
انا شغلتها تانى يوم بعد ما تم التنشيط والربط بالباى بال روحت البريد الصبح بدرى وربطها فى نفس اليوم بالباى بال وتانى يوم اتصلت بالبريد وعرفت رقم العملية وتاكد الربط الفيزا بالباي بال وسحب عليها بالليل
هناء ربيع الموضوع تم كتابته قبل تفعيل السحب التلقائي فى مصر ولكن الان يتم عمل سحب تلقائى من جانب الباى بال يوم ١ فى الشهر دون أى عمولة ولا يتم التدخل من جانب حضرتك سواء فى السحب او استرداد ٥ دولار كالسابق
هناء ربيع نعم .. كما أخبركي الأخ الكريم elbasha ahmed سيتم تحويل الأموال تلقائياً في أول كل شهر.
-------- لاحظي أن الكتابة بغير اللغة العربية في خمسات قد يعرض تعليقك للحذف، وربما تمتنعين من المشاركة في خمسات لمدة يومين. لمراجعة باقي شروط خمسات، من هنا:- https://khamsat.com/terms
هل يوجد حد ادني للسحب من الباي بال الي بطاقة ايزي باي ؟! خل يمكنني سحب 18 دولار مثلا اما انه مبلغ صغير ويوجد حد معين للسحب ؟! وشكرا ع المجهود ارجو الرد للاهمية
الحد الادنى للسحب من الباى بال هو ٢٠ دولار لا اعلم هل السحب التلقائى يسمح بمبلغ اقل ام لا يوجد حد سحب اقصى لفيزا ايزى باى هو ٥٠٠ دولار فى ١٥ يوم من الشهر
ghada ali
لا مشكلة ان تكون العملة فى الباى بال بالدولار عند السحب على فيزا البريد المصرى يتم تحويلة بسعر الصرف للدولار لا اعلم هل يوجد طريقة لاى فيزا للسحب بالدولار
اليوم سحبت رصيد لاول مرة .. ورحت على أٌرب بنك لي وهو العربي الأفريقي
وجربت اسحب 3000 ج مرة واحدة ( وهو الحد الاقصى للسحب اليومي ) وسحب الحمد لله
وسألت بالبنك قالوا فعلا الحد الاقصى للسحب بالبنك العربي الافريق 3000 ج في مرة واحدة ... بالبنوك الاخرى كلها 2000 ج بالمرة الواحدة ( يعني تسحب 3000 على مرتين ) ويخصم منك رسوم سحب مرتين
يمكنك إرسال الأموال إلى أي حساب آخر من رصيد الفيزا المربوطة بباي بال لكن رصيد باي بال لا يمكنك إستخدامه للشراء أو إرساله لحسابات باي بال أخرى
Raniaashraf
فى حالة التمكن من تفعيل البطاقة فهى أفضل من حيث العمولة حيث يتم تحويل الدولار بسعره الرسمى فى حالة عدم التمكن من تفعيل البطاقة فلا بديل عن الوكلاء ونسبة الوكلاء تختلف من شخص لآخر
شكرا على الشرح الوافى، وسؤالى هل ما زالت فيزا البريد تسحب من الباى بال حتى الآن لأنى كنت سألت صفحة البريد على الفيس على هذه الخدمة وقالوا لا مش بنتعامل مع الباى بال أرجو التوضيح لأنى مش عارفة أبدأ شغلى لهذا السبب، ولو فيه طريقة أخرى ممكن توضيحها، جزاكم الله خيرا
تحية منى لك اخى الكريم على هذا الموضوع الرائع انا سحب بالفعل على ايزى باى البريد المصرى واكتمل فى باى بال وانتظر وصول المبلغ لبطاقة الايزى باى واخاف ان لا تكتمل بالرغم من انها مكتملة فى الباى بال سوف انتظر يومين او ثلاث واسحب فى مكتب البريد الله الموفق
شكراً أخي لمجهودك الكبير وعندي سؤال في نفس السياق لدي بطاقة خصم مباشر Debit Card النوع VISA من بنك QNB وهي (مُفعَّلة) على باي بال وقرأت تعليقات كثيرة من ستقلين على فيس بوك أعلنوا أنهم سحبوا أموالهم بنفس نوع البطاقة ولكن أنا لا أستطيع السحب! السحب التلقائي مفعل ولا يسحب وحاولت السحب يدوياً، ولكن لا فائدة وحينما حاولت مراسلة الدعم، أرسلوا لي إيميل يقول أن الأموال لا بد أن تُحتجز لمدة 30 يوماً قبل السماح بسحبها وذلك على الرغم من وجود رصيد منذ يناير وفبراير!
هل واجهت أحد منكم تلك المشكلة؟ أو هل يعرف أحدكم كيفية حلها؟
لقد قمت بتحويل مبلغ 600دولار مرة واحدة وهذة هى المرة الاولى للتحويل يوم26/4/2019 والىالان معلقه على باى بال علما بان البطاقة باسم والباى بال باسم اخر ارجو الإهتمام والرد
الحد الاقصى للسحب ٥٠٠ دولار خلال ١٥ يوم اتوقع ان يعود الرصيد للباى بال مرة اخرى يمكنك حينها سحب الرصيد على مرتين مرة بمبلغ وليكن ٤٥٠ دولار والباقى بعد ١٥ يوم
بخصوص الاسم فى حالة انك سحبت مبلغ فى حدود الحد الاقصى وحدث انه رد المبلغ مرة أخرى حينها ستقوم بتغيير إسم الباى الى اسمك فى الفيزا وتحل المشكلة
عندي استفسار. دلوقتي انا اسمي. محمد مصطفي محمد في البايبال mohamed moustafa و عملت فيزا باسم ولدتي وربطها في البايبال ولما بعمل حسب بيقعد المده وترجع تاني الامهم توقعت من الاسم علشان مختلف ف عملت واحده تانيه باسمي ال. في اللبطاقه دلوقتي اخلي اسمي ايه في البايبال مع العلم اسمي في الفيزا محمد مصطفي محمد احمد اخلي اسمي ايه في البايبال؟؟؟؟ علشان اقدر اسحب منغير مشاكل
سؤال حضرتك لما اجى اسحب المبلغ لاول مرة هل ابقي ال100 جنيه الأولى اللى اودعتها بالفيزا زى ما هى ولا اسحب المبلغ اللى متحول من بايبال بالاضافة ل100 جنية اللتى اودعتها؟
قمت بشراء فيزا البريد المصري كما طرحتم و قمت بعمل الحساب على البايبال و في خطوة الربط رفض البنك العملية فتواصلت مع خدمة العملاء لبنك البايبال و ردوا باسرع وقت و قالوا ان مصدر بطاقة الفيزا رفض عملية سحب 1$ لتأكيد البطاقة و طلبوا ان اتواصل مع البريد
تواصلت مع البريد قالوا و بعد عذاب انهم يريدون عملية السحب تكون باليورو و ليس بالدولار !!!!
أولاً : هل قمت بشحن رصيدك فى الفيزا لكى يتم السحب من رصيدها ثانياً : لا مشكلة فى السحب سواء باليورو أو الدولار لان الفيزا تقوم بتحويل العملة للجنيه وسحب الرصيد منها وبالفعل عند التفعيل يتم سحب مبلغ يقارب من 1.25 يورو . لذلك حاول مرة أخرى وتواصل مع البريد أن السحب يتم بأى عملة طالما معاملات أونلاين وفى حدود الحد الأقصى المسموح به من الفيزا
شرح وافي وكافي ربنا يجازيك كل خير مشيت عالخطوات وبعتت الرساله دلوقتي
مش فاهمه بس النقطه دي باي بال بيخصم 5$ عمولة على أي مبلغ مهما كان حجمه ولكن ال5$ دي بتقدر ترجعها لو سحبت خلال ال4 أيام الأولى من الشهر، بتكلم الدعم وتطلب منهم يرجعوا ال5$ رسوم التحويل لأنها بتبقى مجانية مرة واحدة أول الشهر.
لدى استفسار ... فىالبدايه كنت أواجه مشكلة في سحب الأموال من خمسات بسبب استخدام بطاقه ماستر كارد ، وبعد ذلك قمت باضافة بطاقة ايزى باى إلى حسابي على Paypal وهي تعمل بشكل مثالي الان وقد استلم حسابي اول دفعه من ارباحى من خمسات والحمدلله.
لكنني الآن أواجه مشكلة جديدة ، لقد حاولت عدة مرات تحويل الأموال إلى بطاقة الايزى باى ، وفي كل مرة يظهر لى نفس الرسالة. تقول "نحن آسفون. لا يمكننا معالجة طلبك الآن. يرجى إعادة المحاولة لاحقًا." لا أعرف لماذا تلقيت هذه الرسالة هل يوجد مشكله بحسابى ام على اولا مخطابتهم لتفيل استقبال وارسال الامول ، هل يوجد احد يواجه نفس المشكله ؟ .. لقد قمت بالاتصال بالبريد مصرى لمعرفة الاسم المصدر للبطاقه وهل مطابق مع اسم حسابى على بايبال ام لا، وكان ردهم ان الاسم المصدر للبطاقه هو اسم شراء عام وليس له علاقه باسمى فقمت بمراسلة خدمة عملاء بايبال واوضحت لهم المشكله وحاليا انتظر الرد ...
تم إلغاء هذا السحب لأن المعلومات الخاصة بالحساب البنكي أو بطاقة الدفع المربوطة بحسابك على PayPal قد لا تكون ممتثلة للمقتضيات التشريعية الخاصة بمكتب مراقبة الأصول الأجنبية (OFAC) التابع لوزارة الخزانة الأمريكية.
السلام عليكم أنا امتلك حساب paypal عليه اموال ولكن مربوط ب فيزا اخري غير البريد و لبنك أخر هل استطيع ان استخدمها و اربطها بفيزا البريد؟ ولا يشترط حساب paypal جديد
السلام عليكم انا اواجه مشكلة في السحب، فبعد ربط الفيزا لا يمكنني السحب حيث تصلني رسالة من الباي-بال بان العملية تم رفضها من قبل مصدر البطاقة، ولا اعرف كيف اقوم بحل هذه المشكلة، مع العلم اني قد قمت بتفعيل البطاقة وربطها بشكل سليم فهل يعلم أي احد طريقة لحل هذه المشكلة
لا توجد مشكلة فى عملة الحساب حيث أننى فى نفس الشهر يتم سحب مبلغ من الباى بال باليورو والدولار وكل منهم يتم تحويله منفصل للفيزا بقيمة الدولار واليورو بدون أى مشاكل
Mohamed Alaa Eldin
فى الغالب تكون المشكلة من البريد لذلك لابد أن تتواصل معهم وتستمر فى الالحاح للطلب
انا لدى فيزا ايزى باى مفعله واستخدمتها فى السحب من باى بال لمده ٤ شهور ولكن هذا الشهر الباى بال ارسل لى رساله ان الفيزا هذا لن يتم تنزيل الأموال أوتوماتيكيا عليها بعد ذلك وأعطانى فرصه لربط حساب باى بال ببنك امريكى او فيزا أخرى وأرسلت لدعم باى بال أسأل عن السبب منتظره الرد وكذلك حاولت التواصل مع البريد المصرى لكن كان وقت الاجازه وطلبوا منى معاوده الاتصال مره أخرى الاسبوع القادم ما الحل فى هذه المشكله بالمناسبه الحساب عليه ٥٠٠$
جزاك الله خيراً ورزقك الجنه اريد إرسال مبلغ 159 دولار أو 152يورو لشركة ألمانيه... إستخرجت اليوم فيزا إيزى باى من البريد سألت الموظف عن إمكانية إيداع دولار أو يورو فأخبرنى بعدم إممانية ذلك فهل يفى ذلك بالغرض إن أودعت ما يعادل المبلغ بالجنيه المصرى مضافاً إليه العمولات بالبريد ؟ وبماذا تنصحوننى؟
الايداع يكون بالجنيه ولابد ان يكون الرصيد يكفى المبلغ المطلوب والعمولة مع الوضع فى الاعتبار أن سعر العملة قد يكون أعلى سعر فى السوق بالاضافة لعمولة الموقع الذى ترسل اليه الاموال
انا جربت سابقا الشراء عن طريق الفيزا مباشرة وعن طريق الباى بال وكانت المعاملة سليمة وسريعة
مرحباً بك، نرجو استخدام اللغة العربية الفصحى لكتابة التعليقات، استخدام اللهجات المحلية أو لغات أجنبية مخالف شروط الاستخدام https://khamsat.com/terms, وشكراً.
اولا شكرا لك ثانيا أود أن أسأل إذا ذهبت للبريد المصري و أردت أن اسحب مبلغ ٣٠٠٠٠ جنية مصري فهل يمكن سحبه علي مرة واحدة أن سيتم تقطيع المبلغ علي مرات متعددة؟؟ شكرا
مرحباً بك، نرجو استخدام اللغة العربية الفصحى لكتابة التعليقات، استخدام اللهجات المحلية أو لغات أجنبية مخالف شروط الاستخدام https://khamsat.com/terms, وشكراً.
مرحباً بك، نرجو استخدام اللغة العربية الفصحى لكتابة التعليقات، استخدام اللهجات المحلية أو لغات أجنبية مخالف شروط الاستخدام https://khamsat.com/terms, وشكراً.
عندما اقوم بالاشتراك لأول مرة واضع بياناتي ويبلغني الموقع بانه سيرسل لي رسالة نصية على الهاتف .....لا تاتي ايه رسالة على الاطلاق بالرغم انني اخترت الدولة الصحيحة واللغة الصحيحة