خلال الحرب العالميه التانيه المدفعيه الالمانيه كانت في عزها, عدد كبير جدا من الطيارات اللي كانت أمريكا بتبعتها كانت يا أما القذائف الألمانيه تضربها ومبترجعش أصلا يا أما بترجع قطع غيار D':

فالأمريكان قرروا انهم يزودوا الطيارات بدروع قويه تخلي الرصاص ميبوظش جسم الطياره, بس المشكله هي ان لما نحط الدرع علي جسم الطياره هيزود وزن الطياره جدا جدا جدا ! فالطياره هتحرق بنزين اكتر وهيخلي الطياره تقيله جدا فمش هتتحرك بسهوله في الجو,...هنا احنا بنتكلم علي حرب ياجماعه :D يعني لو مبتتحركش بسرعه وبسهوله ف الجو الطياره هتقع مع اول صاروخ هيتضرب عليها.

وطبعا لأن كل مشكله وليها حل علمي إبن ناس قعد المهندسين والعلماء ساعتها ولقولها حل.

الحل السحري !

قاللك بدل المرمطه دي نركز عالمهم وبس, هنتقل الدرع في الاماكن اللي بتمثل خطر عالطياره ونخففه في الباقي وعشان يعرفوا الاماكن دي المهندسين قالوا بسيطه! احنا نجيب الطيارات اللي رجعت من الحرب ونشوف الاماكن اللي فيها رصاص كتير فين ونزود فيها سمك الدرع ونقلل ه في باقي اجزاء الطياره. وبعد ما بدأوا شغل لقوا ان جسم الطياره والجناح بيبقي فيهم رصاص كتير والمحرك بيبقي تقريبا مفيهوش رصاص خالص !

بعد الكلام ده كله طلع Dr. Wald عالم رياضيات قال ان اللي بتقولوه ده حماده!! :3, احنا المفروض نتقل الدرع جدا في الاماكن اللي مفيهاش رصاص اصلا

كلهم سكتوا وعم الصمت عالهبل اللي اتقال ده وغالبا كانوا هياخدوه علي قد عقله ويطلعوه من المشروع اساسا

:v

بس لما جيه يوضح نظريته قاللك في الواقع علامات الرصاص في الطياره بتبينلنا ان دي اقوي الاماكن في الطياره.......دي الاماكن اللي لو الطياره اتضربت فيها هتعرف ترجع امريكا, ممكن يكون فيها اجزاء متدمره بس هتعرف ترجع. زي بالظبط لو دخلت مستشفي هتلاقي ان معظم المصابين مصابين في رجلهم او في كتفهم, وغالبا مش هتشوف مصابين كتير برصاصه في القلب او الرئه !! بس ده لا يعني اننا لما نعمل درع للانسان نعمل درع للايد والرجل ونسيب الصدر....لان ببساطه لو الرصاصه جت في الصدر غالبا الراجل مش هيعيش لمرحلة انهم يودوه المستشفي اساسا فتقل الدرع جدا عند الاماكن اللي مفيهاش رصاص في الطيارات اللي رجعت من الحرب لان غالبا الطيارات اللي رجعت هي الطيارات اللي ما اتضربتش في الاماكن دي. وده انقذ طيارت كتير جدا للامريكان خلال الحرب العالميه التانيه

وليد والSurvivorship bias
اللي حصل ده في علم النفس إسمه Survivorship Bias, دي عباره عن مطب في تفكيرك بتخليك تركز علي اللي نجي/نجح من موقف معين وتتجاهل المحاولات اللي فشلت.مشكلة الBias دي إنها ممكن بسهوله جدا تقعدك طول اليوم محبط وحاسس ان مفيش فايده....... زي بالظبط ما حصل مع وليد!

أحمد قرر يروح يتمرن كوره..... في اول تمرينه اتشرحله كام حركه أساسيه في ربع ساعه وقعد بعدها 4 شهور كل اللي المدرب بيعمله انه بيصححله الاخطاء اللي بيعملها وهو بينفذ الحركات دي. بعد ال 4 شهور أحمد نزل يلعب كوره مع وليد صاحبه, وليد اول ما شاف أحمد وهو بيشوط الكوره انبهر جدا فقرر انه هيجرب هو كمان وراح التمرين اللي بيروحه أحمد, ولأنه لسه جديد فوليد شاط الكوره غلط, حاول 3-4 مرات كمان وكل مره بيبقي فيها غلطه المدرب بيصححهاله....مره بعد مره وليد أحبط وقرر وليد انه مش هيلعب كوره تاني وانه "ملوش في الكوره" عشان لما اتمرن في نفس التمرين بتاع أحمد معرفش يلعب الكوره زيه, هنا وليد وقع في ال Survivorship bias
وليد بقي مع كل غلطه يقارن الشوطه اللي شاطها بشوطة أحمد اللي قعد يتمرن عليها 4 شهور ومع كل مقارنه يحس انه فاشل, في النهايه وليد أحبط جدا وقال في نفسه "أنا فاشل في الكوره" وساب التمرين.....

مشكلة الSurvivorship bias
الsurvivorship bias بتخلي الشخص يركز اووي علي النجاح اللي غيره بيعمله ويتجاهل اوقات فشله, زي بالظبط المهندسين اما حبوا يحددوا الاماكن المهمه لدرع الطياره, ركزوا برده عالاماكن اللي فيها رصاص في "الطيارات اللي رجعت سليمه" وده خلاهم ياخدوا قرارات غلط جدا وبرده ممكن يخليه ياخد قرار انه "مش شاطر بما فيه الكفايه" او "البشريه كلها طلعت الفضاء اهو وخدت نوبل وخلصت البيزنس بتاعها وانا لسه قاعد " في حين انهم ما شافوهمش وهما محبطين و بيفشلوا ويعيطوا وينهاروا احيانا, وبيركزوا بس عالchapter اللي بدأوا فيه يحصدوا ثمار المرمطه اللي اتمرمطوها.

هنا وليد ساب كل الشوطات الغلط اللي أحمد قعد فيها 4 شهور وركز علي الشوطه الصح الاخيره وقارنها بأول شوطه ليه, بالرغم من انه عارف ان وليد بيتمرن من 4 شهور ومدرك ده كويس اووي. دي مشكلة اي bias عموما, انك مبتلاحظش المنطق اللي وراها في الموقف.

الفكره هنا ان المتميزين اووي بيتميزوا اساسا بسبب انهم بيحبوا يفشلوا ! اه والله زمبئولك كده او بمعني تاني مبيخافوش يغلطوا, بيشوف ان كل غلطه بيعملها بيتعلم حاجه جديده.
ده اللي بيفرق فعلا بين النص نص والمتميز. الموضوع ده قعدت فتره كبيره شايفه انه كلام عادي عشا ننتحفز ومنخافش من اللاخطاء و...و..و.. لكن المدهش إن علماء النفس والNeuroscientists عملوا ابحاث كتير جدا في المجال ده لحد ما وصلوا ان فعلا المخ بيتعلم بالطريقه دي, الموضوع مشروح بشكل أكبر في اللينك ده

اتعلم النجاح من الفاشل

كتير جدا من الناس المتميزه بيبنوا قوتهم علي انهم بيشوف ليه اللي بيفشل بيفشل وميعملوش زيه, من الحاجات اللي اتسغربتها جدا إن جيف بيزوس مؤسس موقع امازون كان دايما بيسأل سؤال واحد طول الوقت "ايه المنتج او الخدمه اللي لو اتعملوا أمازون هتخسر السوق" من هنا بقت امازون دايما سابقه السوق بخطوه, ومن هنا جت فكرة الKindle e-readers لما لقوا ان مبيعات الكتب بتاعتهم هتنهار لو الeBooks انتشرت في السوق فبدأوا يصنعوا الكيندل وبقوا هما نفسهم من اشهر الشركات اللي بتبيع eBooks علي مستوي العالم. امازون بنت نجاحها علي انها بتتعلم من الاخطاء اللي ممكن هي نفسها تقع فيها.

الSurvivorship bias وأمازون بييقولولك ان زي ما هو مهم انك تقلد الناجحين, مهم برده انك تشوف اللي فشل ده فشل ليه اصلا !! لما تبص عالصوره من بعيد هتشوف مطبات وحفر غيرك مشفهاش وهتوفر علي نفسك معاناه وبهدله كتير !

ده المقال اللي جبت منه معظم المعلومات لو عايز ترجع للمصدر D: Survivorship Bias
تفتكر ايه المواقف التانيه اللي ممكن فيها الSurvivorship bias تلبس في الحيط ؟

#اتعلم_النجاح_من_الفاشل
#البلوج
#في_رحلة_البحث_عن_الShortcuts
عن الموضوع

التعليقات (6)

منذ 6 سنوات و11 شهر
أختي الكريمة من الأفضل أن تكون المقال تاللغة العربية الفصحة و ليست بالدارجة
منذ 6 سنوات و11 شهر
نفس تعليق الأخ التونسي المحترف
من الأفضل تكون المقالة باللغة العربية الفصحى
جذبني جداً العنوان و دخلت للقراءة و إذا بي أتفاجئ باللغة
منذ 6 سنوات و11 شهر
المقال رائع جداً، ويحتاج بالفعل للوقوف عنده، سلمت أناملك أختي العزيزة.
أنصح بقراءة المقال :)
منذ 6 سنوات و11 شهر
المقال جيد.. ولكن على الأغلب العميل يطلب مقالات ومواضيع باللغة العربية الفصحى.
منذ 6 سنوات و11 شهر
أشكركم علي نصيحتكم وكلامكم الجميل :)) ساضعها في الاعتبار المره القادمه باذن الله
منذ 6 سنوات و11 شهر
المقال ممتاز وأنا كمصري فهمته .. لكن دائماً يجب مراعاة أن سوق الانترنت عربي وليس مصري فقط فالأفضل استخدام اللغة العربية الفصحى حتى يكون المقال للعرب ككل وليس للمصريين فقط .. لأن كما لا نفهم نحن بعض اللغات العربية المدرجة من بعض الدول .. هم نفس الحال لا يفهمون اللغة المصرية العامة ...

" تحياتي " المقال حقاً رائع
عن الموضوع